Rene Heiligers

René HeiligersAafsjeit neume van René. Ut liek zwa oonwerkelik. De hoofdes mer um te kieke en René waor dao en noe in eine sjlaag is heer weg. En este dan get moots zegke euver eemes deh dich zwa deerbaar waor wilste allein mer gooj dinger zegke en allein mer serieus dinger.

Gooj dinger zegke euver René is neet lestig want ut waor gewoon unne gooje joong, meh serieus dinger euver höm vertelle is al get lestiger want ’t waor mich unne sjwanne. Wat höbbe veer veul sjpas mit höm gehad.René, ‘nne enfant terrible meh dan waal in de gooje zin van ’t woord. Eine met völ kattekwat. René, kameraod dat waor ’t woord dat ’t beste bie dich pasde. Kameraod veur Arlette, kameraod veur diene Pap en Mam en dien familie, kameraod veur dien vrun, kameraod op dien werrik, kameraod veur de Sjutterie, kameraod veur de kloomp, Unne kameraod veur eederein. Kameraod umdat stich altied klaor sjtoongs veur eederein, hulpvaardig estich waors. En of dat noe op ’t werrik waor, bie dien vrun of bie de vereiniginge, veer hoofde mer um te kieke en dao waor René. Dat waor un jhel fijn geveul de zekerheid van dien sjterke han altied in ooze rök te veule. Eine van de ouwe sjtempel, plichsbewus en altied dao. Altied jao, bang este waorsj datste get misdes. Want es kattekwat koos weure oetgevreete gingste veurop en waorste in dien element.

Meh auch altied dao umdat stich voongs dat dat zeu wjerde. De bis bie un vereiniging en dan mootste aug dao zeen, allein dan greujt unne band en dao gings dich veur. Dat kosde dich auch gans get verlofdaag en geruil mit dien collega’s op ut werrik. Meh es dich ut dan örriges neet mit eins waors, dan waors dich aug neet bang um dien meining te geve. Auch neet euver geveulige zaake. Reg door zjeh, niks verbloome meh zegke wah ut op sjtoong. Dan waorste ut kwiet en dat leifde mekkelik, voongste. Sooms waor dat waal hel meh ut waor in eeder geval duudelik. En este ut dan kwiet waors dan waor ut good en wat de meerderheid besjlisde lagste dig dan aug bie neer. Oonreg waor unne rwajje lap veur dich en zeu heit meinigein un kopstjwetsje van dich moote verwerrikke.

Dich waors veural kamerödsje van Arlette, dien vruike, oonaafsjeidelik, geer deeg alles saame. Geer houwt dan aug völ dezelfde interesses en wie ooze Leeve Hjer de hertsjes heit oetgedeilt moot geer waal in dezelfde wachkamer höbbe gezete. Arlette verweet dich waal ins datste alles weg gaofs. Dich waors inderdaad unne gunner. Dich gaofs dichzelf weg, dao hoofdes dich neet euver nao te dinke, dat zoat in diene aard. Dat maakde dich waal ins sjleg van goojigheid. Arlette waor jel bezörrig um ziene sjat. En este dan al 5 minute te laat van ’t werrik thoes koams waor Arlette dich al aan ’t belle wahste bleefs, bang dat dich get gebeurt waor. Want geer had nog gans get planne saame. Die planne moot Arlette noe allein goon aafmake, meh René veer goon Arlette daobie helpe in de Geis van wiesdich dat gewilt zous höbbe.

Bie de sjutterie höbste nao diene transfer van Sjummert nao Meersje direk dien plaats gevoonge. Neet zeure meh werrike waor dien motto en zeu höbste gans get oore mit op de sjteiger gesjtange wie veer ooze sjuttetoore aan ’t metsele waore. Bie ’t sjeete op de bulkes wiste ’t binne ’n paar jaor te bringe tot ’t A zestal. Jers beste B sjutter, vervolgens beste A sjutter en dit jaor tjweds achter Matje bie ’t A. En auch hie weer dien sjterke hand in ooze rök. Want dich koos de zenuwe aan en dus sjoots dich achterop. Ging ’t voorheen bie de letste 3 bölkes meistal mis, noe hoofde veer nao 15 sjeut mer um te kieke en dan kaom René. Dat koos neet mis. Wat blief zeen louter sjwan herinneringe en dat is neet genoog. Veer moote hie get van ljerre. Allein dan is dit alles neet veur niks geweis. Laote veer in de Geis van René klaor sjtoon veurein, oos oonderein helpe zoonder dat op un wheigsjaal te legke. Kameraodsjap kump neet vanzellef, dao mooste in investere en es God bleef, kump watste drin duuts auch unne kjer droet.

René veer zulle dich neet vergete. Veer zulle altied achterum blieve kieke, want René bie ut letste bölke deenke veer aan dich.

 

free joomla template