Pierre Barbier

Pierre BarbierVandaag goon veer mit Sjuttejher aafsjeit neume van Pierre Barbier.

Pierre woort op 10 juli 1931 geboore in zien geleefde Meersje en ging es klein menneke sjus wie ziene Pap bie de Meerssener Nachtegale.

Dao preufde heer veur ‘t jers de gemeinsjapsgeis deih heer daonao bie zwa veul vereiniginge heit oetgedrage. Ich neum; De Beeker Liedertafel, De Hermenie, Sjeigelentaire, ’t Meersjes Mannekwar, Sjutterie St. Remigius.

Pie trouwde zien Mia en saame kreege ze 4 kinger. Hun geluk waor heum alles aan gelege en dao heit heer op de Pepierfebrik mennig euvereurke veur gedrejd.

Zien kinger kreege ’t vereinigingsleeve mit de paplepel ingegeve en auch wie de kleinkinger begooste te koome wis Pie bie hun de sjuste sjnaar te raake. Sjus wie ’t gezin waor veur Pie ’t vereinigingsleeve ‘nne hooksjtein van oos Saameleving. En dao mootste hel aan werke en dich zelf bie wegciefere. En dat letste koos Pie good. Pie sjtoong neet geer op de veurgroond. De einigste kjer dat heer solo zoong waor nao de sacrementsprocessie aan ’t buffet bie de Keizer. Oondanks zien besjeijeheit profileerde Pie zich door plichtsbesef, inzat en veurbeeld geve. Daoveur is heer bie de Sjutterie dan auch beneump tot Officier. Dao waor Pie biezoonder grwetsj op.

Pie is oondersjeije mit de medaille van beste A-Sjutter en tot zien letste daag heit Pie in zien garage gezeuk nao de beste saamesjtelling veur de keugel, wah heer oontelbare van heit gegote.

Pie waor waal besjeije meh dat naom neet weg dat heer zien meining oongezoute gaof. Es Pie op de jaorvergadering in de roondvraog ’t woord vroog en begoos mit:’Dat zal ich uch vertelle… en dan auch nog ’n sigaretsje debie drejde koos te ’n hauf eurke oettrekke. Meistal es heer dan gein geliek kreeg sjloot heer geksjerend aaf mit legendarische oetsprake wie: Leig Petrwanne zeet g’r of Corrupte Boevebende. Wie veer ’n paar jaor geleje de winnaarpokaal van ‘t sjeete op Pinksterzaoterdig de Pie Barbiercup umduipte waor Pie ’n levende legende gewoore. Pie is 73 jaor gewoore mit hel werke meh auch genete van ’t leeve. Pie hauw zien Leeve in balans en saame mit Mia hubbe ze dat auch oetgedrage.

Veer goon noe aafsjeid neume van Pie… ‘nne biezoondere Miensj. Pie, Kammeraod… nog eine kjer marsjeer veer mit dich.

 

free joomla template